964. 【反修例】着草去台灣 – 反送中變自動送中

着草去台灣

前天見到報道話廣東海警截獲偷渡人蛇12人經海路去台灣，在海上被截。據報道廣東海警只是話8月23日在海上拉了12人其中有李XX及鄧XX等人，完全沒有說出詳細個人資料。但媒體很多就話有知情人士告之是成班犯了反修例暴動罪的疑犯在保釋期間集體走路着草，仲連大部分有關人士的姓名都報道出來。

由這報道可以看出幾個問題。

反修例冇大台之說完全破產

因為十幾個人所犯之案件及案情不是單一案件，所干犯之罪名也各異，犯案地點及案情也各不相同，按反修例時瘋瘋話佢哋完全無大台，是市民自發去搞事，咁要點解釋十幾個犯若無大台，全部都是個人走去犯法，無大台，也應毫無關連及完全不認識，又點會一齊集中出發坐大飛從海路走路去台灣，顯然是有大台集中安排一眾"手足"一齊着草。有理由相信佢哋全部自己友都各自認識的手足，因此反修例時合謀破壞香港。

點解大老闆要送走佢哋而唔係俾錢佢哋打官司??? – 又是錢作怪，又是成本問題

我想這點才是最重要，有大台在幕後支持都已經肯定的啦，大家都不用估估下，有定無這個無聊問題。

問題是點解大後台要安排佢哋走佬而唔係繼續在香港玩抗爭，我想最大問題就是：錢、錢、錢同錢。要養呢班靚，之前佢哋仲話有利用價值，玩下前面無大台，四處搞暴動放火暏路破壞，而班差佬完全做唔到嘢，又唔拉佢哋，咁只要俾少少錢班友仔就可以叫佢哋做嘢。但現在差佬忽然認真起來，四處拉人去告，咁就成本大增，俾人告俾人拉，全部都要班大狀幫手，邊有咁多免費義務律師唔收錢，齋同你打官司，仲要唔知打到幾時，又超多CASES，同政府玩有排玩，政府大把錢，日日可以同你打官司，全部都係阿爺數，真係好似美國隊長咁話，佢可以成日同你打。但咁多官司，單是要時時安排上庭研究個CASE都有排做，唔收錢唔沖白做，計下條數，時間大狀費用仲有安家費，想起都頭痕，筆錢計落唔少，美國同台灣唔係俾咁多咋，長貧難顧，俾一筆錢一百萬唔駛送哂佢哋去台灣就一了百了，之後即事就叫台灣ENGLISH CHOI搞埋啲手尾就算。這是最簡單直接低成本的方法去處理成幾十宗CASES的手下方法。佢哋走咗，大狀就唔使處理咁多CASES嘞，等警察去全球通緝班犯，有排，十年百載都唔定。送咗班友去咗台灣，官司費用日常衣食費用全部一了百了唔使再負責仲同佢哋想，佢哋在台灣食自己，自己搞惦算數。好過在香港，冇錢養佢哋分分鐘爆大鑊，篤灰出來。

 

冇大台着草的大飛船票是免費供應嗎???

你會否相信有免費義務大飛送你去台灣???據報道話有公價着草去台灣的船票價，話約是一萬美元價。按這班友仔看來看去都不是大富人家，看來船票都是大台老細俾，即是有水喉射住啦。即是飛一飛12起碼要12萬美元，即約96萬港元，按我們看警匪片，通常着草交通費用，都要先科水才會被安排上船走佬，因為人家都怕你走咗無錢俾，所以一定是事先科水，仲要是CASH冇賒住。

着草風險都頗高 – 最緊要買齊保險同有救身衣 (香港政府規定一定要每人有一件救身衣，否則犯大法)

據報道話着草人蛇可被判一年監，而蛇頭最高可判終身監禁，即是話車你個蛇頭分分鐘仲重罪個人蛇，條數真計唔過。另外，大家都知，行船跑馬三分險，搭大飛，都唔知有冇暈浪丸送，有唔知有冇救生衣，一人一件，仲有無買齊保險、第三者保險等，出事都有得CLAIM。

還有風高浪急，一下唔小心跌落水，船夫都唔知會唔會停船救你，若唔識游水，風險指數又會上升幾成喎。

又話要勇武抗爭，又話無自由無寧死，點解又怕死走佬呢

都唔知現代青少年是否講一套又做一套，明明話要勇武抗爭，不怕死架，無佢哋要既民主自由就寧願死咗去咁話，但轉頭只是被人拉去告幾條罪，都未要判死刑，只是最大可能都是坐幾年監都食下皇家飯啫，咁就要走佬着草，之前殺人放火又唔驚，俾人拉要告就驚，咩嘢想法同邏輯嚟架。正如警察所講，犯了法就要伏法受審坐監，否則成班警察咪無存在價值囉。最搞笑就是成班走咗佬的人在外國仲叫啲人在香港繼續抗爭，但自己就走咗佬嘆世界，真唔知佢哋有冇良知。

點解反送中變咗自動送中

成班友仔反修時咪話怕反送中會俾中國在國內嚴刑酷拷問，但點解現在反過來自動送上門，自動送中，真是搞笑。咁現在佢哋成班在國內係係咪受緊滿清十大酷刑，唔知有無記者上去訪問下佢哋，最好叫哂成班成年同未成年的假記者上去廣東上訪班香港人蛇。直接問下佢哋現在由幻想怕反送中變成真實版自動送中的感受，成班現在直接享受自動送中的樂趣，唔知係咪超HAPPY，不再是莊周夢蝶了。

屠龍不成，成為中國龍點心，被中國倚天劍破滅 – 12偷渡人蛇中有四個屠龍小隊成員

據報道話人蛇中有四個是去年屠龍小隊骨幹成員，正如武俠小說所云：寳刀屠龍，號令天下，倚天不出，誰與爭鋒。今次班屠龍精英正正被中國龍用倚天版槍械指回去中國國內受審，真是越怕死越見鬼，本來好好地在香港受審，死極都有成班大狀照着，如打不贏官司，仲有李大狀、大律師公會主席、港大教授張可以出嚟，包打贏，唔嬴咪成個招牌俾人拆。所以應放心，留港打官司才是生路。呢次走去玩怒海逃生，唔俾鯊魚食都好好彩了。佢哋屋企人應要還神同開香檳慶祝下人安全。

篤灰 疑惑

你知現代新聞就是冇新聞就要作新聞，新聞不是採訪或報道事實，而是片面及用獨特角度去報道事件，甚至乎沒有事實及現場採訪，就會來過據消息等完全是個人推斷，把想像當事實報道。

有報道話可能(都唔知甚麼叫可能，新聞報道應基於事實而不是推測或可能…)有人做二五或鬼頭仔去篤灰，收了錢去偷渡，又暗中報警，致偷渡者被捕。這些推斷看來都合情合理，理中之一是，大海茫茫，根本不知那架船是偷渡船，唔衝架架船都走去查咩。好似都合情理。

但另外有報道卻是完全相反的情景，話據漁家講，近來中國海警巡邏較以往頻密，幾乎所有船出公海都會被截停查問，大都會上船查看，而這情況過去極小出現，最多是軍演時會較多而已。再結合有報道話已先後至少有二批人成功由海路出走到台灣。若這兩個情況都屬的話，咁就不是篤灰CASE。而是中國海警基於已有兩批人成功由海路逃至台灣，因此有必要嚴加巡邏來堵塞這個海上漏洞，沒有理由讓這海路成為無掩鷄籠，任由香港逃犯從此路走佬。所以近來巡查頻密，凡漁船出公海都幾乎要搜查，正因為絶大部分出海船隻都要搜查，所以就很難走得甩，被捉到就是這原因。故若基於這個事實的話，篤灰就是老作居多，除非找到二五仔出來，而不是隨便找個人出來頂罪就是理由，那只是替死鬼而已。

蔡英文過橋抽板，抽咗香港水成功連任，但現在卻不願接收成班幫佢連任的反修例暴徒

見到台灣陸委會出來俾人問點處理班香港偷渡暴徒，佢地又耍一輪口水，當然話支持班暴徒搞抗爭爭取佢哋自定的民主自由暴動，但話峰一轉，又即刻落閘，話台灣雖然支持佢哋但絶不鼓勵佢哋非法來台灣，要去台灣尋求政治庇護，也要從正式合法途徑來台，所有非法到台灣者，都要受台灣法律制栽….。

喂! 大佬呀! 成班友仔就係俾人拉咗，禁止出境，沒收了出國護照，防止潛逃，先至擺明要非法走佬啫，唔係咩嘢叫做着草呀，台陸委會有無常識架。咁陸委會咁講，即係表明蔡英文過橋抽板，想去年利用香港反修例做借口成功煽動班選民投佢票，現在成功連任，就一聲唔該，對幫佢連任班香港暴徒都棄之不顧，都幾無人性。可見政治這家嘢，都係講利用價值啫。翻臉不認人，都係平常嘢。

若個非法偷渡者是瘋瘋同肥佬，陸委會個古仔會唔會唔同哂呢???????

都唔使講，緊係完全唔同處理啦，ENGLISH CHOI即刻親自迎接同上哂電視，一如蔥蔥到英國俾人當上賓咁招呼，又當然會同佢哋安排好哂所有衣食行程，唔做，一定俾美國國會成班民主黨同侵侵政府柄，可能即刻中止所有軍售同軍事保護網，ENGLISH CHOI既奴性又即刻走哂出嚟。

這就是利用價值不同，招待也完全不一樣。

成功同醒目個案分享

講到醒目仔，緊係要數蔥蔥， 一到六尾即飛，堂而皇之搭飛機去英國嘆世界，仲可以嘆完飛機餐後，再在到步後再在FB大談要走佬，要大家繼續努力，去衝去死，事成之日仲就會回來領功做大少。阿朱牧師個仔也早早走人，袁XX明個老豆也早早飛去美國領下功，攞下着數，這些都是成功同叻叻例子，大拉拉搭飛機走人，同要着草搭大飛、要偷偷摸摸走去德國等，這批都是高手同醒目仔，同這班人出聲佢出力咁儍仔，真是高下立見。

你又睇下瘋瘋仲可以得閒去山頂放下狗、FB上叫人眾籌俾錢去請司機同保鑣同埋佢生活費，仲有時間去搞下參選立法會，得閒做下立會議員同區議員，得閒又可去下台灣美國做下SHOW玩下國際綫，邊似呢班友仔玩到要着草，仲要在海上飄浮，一下唔好彩俾中國海警話要拉人，唔好亂咁郁，否則開槍射人。佢到真要學下瘋瘋同蔥蔥，低風險同埋可以生活得似個上等政治人。